Muztar Khairabadi
jab kaha main ne ki mar mar ke bache hijr men ham
hans ke bole tumhen jiina tha to mar kyuun na ga.e
ham to allah ke ghar ja ke bahut pachhta.e
jaan deni thi to kafir tire ghar kyuun na ga.e
su-e-dozaḳh but-e-kafir ko jo jaate dekha
ham ne jannat se kaha haa.e udhar kyuun na ga.e
pahle us soch men marte the ki jiite kyuun hain
ab ham is fikr men jiite hain ki mar kyuun na ga.e
zahido kya su-e-mashriq nahin allah ka ghar
ka.abe jaana tha to tum log udhar kyuun na ga.e
tu ne ankhen to mujhe dekh ke nichi kar liin
mere dushman tiri nazron se utar kyuun na ga.e
sun ke bole vo mira hal-e-juda.i ‘muztar’
jab ye halat thi to phir ji se guzar kyuun na ga.e
Leave a Reply