Nazm Tabatabai
uḌa kar kaag shishe se mai-e-gul-gun nikalti hai
sharabi jam.a hain mai-ḳhana men Topi uchhalti hai
bahar-e-mai-kashi aa.i chaman ki rut badalti hai
ghaTa mastana uThti hai hava mastana chalti hai
za-ḳhud-rafta tabi.at kab sambhale se sambhalti hai
na ban aati hai naseh se na kuchh vaa.iz ki chalti hai
ye kis ki hai tamanna chuTkiyan leti hai jo dil men
ye kis ki aarzu hai jo kaleje ko masalti hai
vo divana hai jo is fasl men fasden na khulva.e
rag-e-har-shaḳh-e-gul se ḳhuun ki naddi ubalti hai
sahar hote hi dam nikla ghash aate hi ajal aa.i
kahan huun main nasim-e-sub.h pankha kis ko jhalti hai
tamatto ek ka hai ek ke nuqsan se aalam men
ki saaya phailta jaata hai juun juun dhuup Dhalti hai
bina rakkhi hai gham par ziist ki ye ho gaya sabit
na lapka aah ka chhuTega jab tak saans chalti hai
qarar ik dam nahin aata hai ḳhun-e-be-gunah pi kar
ki ab to ḳhud ba-ḳhud talvar rah rah kar ugalti hai
jahannam ki na aanch aa.egi mai-ḳhvaron pe o vaa.iz
sharab aluda ho jo shai vo kab atish men jalti hai
na dikhlana ilahi ek aafat hai shab-e-furqat
na jo kaaTe se kaTti hai na jo Taale se Talti hai
ye achchha shughl vahshat men nikala tu ne ai ‘haidar’
gareban men ulajhne se tabi.at to bahalti hai
Leave a Reply