Zakauddin Shayan
ubharta chand siyah raat ke paron men tha
koi to chehra mire dard ke gharon men tha
vo aks-e-jism jo ḳhvabon men ho gaya tahlil
kabhi in a.ankhon ke simTe hue daron men tha
ḳhunuk havaon ke zanun pe soche hain vo
tiri vafaon ka kuchh dard jin suron men tha
guzishta raat ki andhi bhi aa ke dekh ga.i
aTal sukut ghamon ke samundaron men tha
ye din ka daagh jo raton ko munh chhupata hai
kabhi yahi to sahar ke payambaron men tha
Leave a Reply