zamane men fasana ban ga.i divangi meri
tire parda ne ki parda-nashin parda-dari meri
tu hi ai be-ḳhudi-e-shauq kar kuchh rahbari meri
usi markaz pe lekin aaj tak hai be-ḳhudi meri
har ik parda uTha degi kisi din be-ḳhudi meri
ki jan-e-manzil-e-maqsud hai gum-gashtagi meri
vahi be-tabiyan jin ko bala-e-jan samajhta tha
vahi betabi-e-paiham bani hai zindagi meri
na sahra hai na gulshan hai na rasta hai na manzil hai
ḳhuda jaane kahan le ja rahi hai be-ḳhudi meri
tire jalve har ik shai men nazar aane lage lekin
yahin mahdud ho kar rah na jaa.e be-ḳhudi meri
hudud-e-be-niyazi tak to mujh ko khinch laa.i hai
na jaane ab kahan le ja.egi varaftagi meri
tiri surat nigahon se kabhi ojhal nahin hoti
karishme hain tire jalvon ke ya surat-gari meri
nigahen multafit lab par tabassum kaif ankhon men
Thahar jaa.e isi markaz pe yarab zindagi meri
falak pa-bos hota hai mala.ek sajda karte hain
kahan le aa.i mujh ko aaj shan-e-bandagi meri
na.im-e-ḳhuld to badla hai jaan ka mil gaya lekin
baha-e-dard-e-dil aur qimat-e-divangi meri
hijabat-e-mohabbat ḳhud-baḳhud tai hote jaate hain
nigah-e-kufr-saman kar rahi hai rahbari meri
‘munir’ ik din zamane ko zamana main bana dunga
kahan tak ra.egan ja.egi aḳhir be-ḳhudi meri
Leave a Reply