tujh se mahv-e-guftugu hona paḌa
main se hijrat kar ke tu hona paḌa
main abhi ji-bhar ke ji paaya na tha
maut tere ru-ba-ru hona paḌa
main pareshani men ghirTa tha kabhi
aur hairan bhi kabhu hona paḌa
meri hasrat thi kabhi tu mah-vash
mujh ko teri aarzu hona paḌa
samne lashkar tha jo vo haq pe tha
haq pe mujh ko ai adu hona paḌa
tujh se milta-julta hona chaha tha
ho gaya to hu-ba-hu hona paḌa
Leave a Reply