Dheerendra Singh Faiyaz
tujh ko lagta hai to haan Thiik hai man-mani hai
mujhe ab baat samajhni hai na samjhani hai
varna vo ḳhvab ki ta-umr na so.e koi
niind aa jaati hai is baat ki asani hai
sat.h men is ki siva ret ke ab kuchh bhi nahin
ya.ani rone ke liye aankh men bas paani hai
tajraba us ko bhi kuchh ḳhaas nahin duniya ka
ḳhaak ham ne bhi zamane ki nahin chhani hai
mere chehre pe yahi dekh ke bikhri muskan
main pareshan huun aur us ko pareshani hai
ishq men itni suhulat bhi nahin paoge
jaan par ban paḌi to jaan chali jaani hai
ham kahan ruuh ki baton men ulajh jaate hain
darmiyan apne ta.alluq bhi to jismani hai
Leave a Reply