Tujhe Dil Mein Basaenge Tere Hi KHwab Dekhenge

Shmashad Shad

tujhe dil men basa.enge tire hi ḳhvab dekhenge

miTenge teri chahat men vafa ke baab dekhenge

ye ankhen yaar ke didar ki pyasi hain muddat se

vo aa.en baam par to jalva-e-mahtab dekhenge

ḳhumar-e-ḳhud-parasti bhi kabhi utrega maujon ka

to phir ai qulzum-e-hasti tujhe payab dekhenge

rasa.i jo tiri mahfil talak ik baar ho jaa.e

tujhe nazdik se ai gauhar-e-nayab dekhenge

suna hai niind ke aalam men vo masrur lagte hain

to phir ḳhvabon men us zalim ko mahv-e-ḳhvab dekhenge

tire nam-o-nasab se kya gharaz ai dushman-e-janan

mile zaḳhmon se fursat to tire alqab dekhenge

koi musa-sifat aa kar Dubo.e zulm ka lashkar

tabhi ham aaj ke fir.aun ko gharqab dekhen dekhenge

lab-e-sahil se dekhe hain nazare ‘shad’ maujon ke

junun-o-shauq ki zid hai ki ab girdab dekhenge