Irfan Siddiqi
tu unhen yaad aa.egi ai juebar agle baras
ab to lauTegi parindon ki qatar agle baras
aur kuchh din us se milne ke liye jaate raho
bastiyan bas ja.engi dariya ke paar agle baras
tum to sachche ho magar dil ka bharosa kuchh nahin
bujh na jaa.e ye charagh-e-intizar agle baras
pahle ham pichhli ruton ke dard ka kar len hisab
is baras ke saare zaḳhmon ka shumar agle baras
main na.e mausam men barg-e-taza ban kar a.unga
phir milenge ai hava-e-shaḳhsar agle baras
Leave a Reply