Baqi Ahmad Puri
tu nahin to tera dard-e-jan-faza mil ja.ega
zinda rahne ka koi to aasra mil ja.ega
ai miri chashm-e-pasheman apne aansu rok le
raat ki tanha.i men rone se kya mil ja.ega
zindagi ke karvan par kuchh asar paḌta nahin
ik musafir kho gaya to dusra mil ja.ega
saari basti men faqat mera hi ghar hai be-charagh
tirgi se aap ko mera pata mil ja.ega
sochte rahne se to manzil kabhi milti nahin
chalte jaao raste se rasta mil ja.ega
koi to mera bhi hoga muntazir ‘baqi’ yahan
ik na ik to dil ka darvaza khula mil ja.ega
Leave a Reply