Mansoor Usmani
main huun ḳhamosh magar bol raha hai mujh men
aisa lagta hai koi aur chhupa hai mujh men
mujh se dilli ki nahin dil ki kahani suniye
shahr to ye bhi ka.i baar luTa hai mujh men
tujh ko chahat hai vafa ki to mujhe ghaur se paḌh
vo kitabon men kahan hai jo likha hai mujh men
muskurata hua maqtal se guzar aaya huun
zindagi teri koi ḳhaas ada hai mujh men
ye alag baat ki alfaz hain mere lekin
sach to bas ye hai ki teri hi sada hai mujh men
mere sheron se bikhar sakte hain us ke gesu
tera andaz bhi ai bad-e-saba hai mujh men
laakh ḳhamosh sahi saari faza.en ‘mansur’
bolne vaala magar bol raha hai mujh men
Leave a Reply