Liyaqat Ali Aasim
tu na tha teri tamanna dekhne ki chiiz thi
dil na maana varna duniya dekhne ki chiiz thi
kya ḳhabar mere junun ko shahr kyuun raas aa gaya
aise aalam men to sahra dekhne ki chiiz thi
tum ko ai ankho kahan rakhta main kunj-e-ḳhvab men
husn tha aur husn tanha dekhne ki chiiz thi
lams ki lau men pighalta hujra-e-zat-o-sifat
tum bhi hote to andhera dekhne ki chiiz thi
aa gaya mere makan tak aur aa kar rah gaya
barishon ke ba.ad dariya dekhne ki chiiz thi
dhuup kahti hi rahi main dhuup huun main dhuup huun
apne saa.e par bharosa dekhne ki chiiz thi
shaam ke saa.e men jaise peḌ ka saaya mile
mere miTne ka tamasha dekhne ki chiiz thi
Leave a Reply