Bargashta-Talai Ka Tamasha dikhaun Main

Haidar Ali Aatish

bargashta-talai ka tamasha dikhaun main

ghar ko lage jo aag to paani bujhaun main

jins-e-giran-baha ka kharidar kaun hai

yakta nahin ilahi jo chori hi jaun main

lala-rukhon ke husn ka bhuka huun is qadar

dil ho na sair laakh agar daagh khaun main

ankhen miri kare jo munavvar jamal-e-yar

ghē ke charagh tuur ke uupar jalaun main

murde ki tarah sote hain kaise mire nasib

thokar se pa-e-yar ke un ko jagaun main

bosa mile kaman ka jo abru-e-yar ki

mehrab-e-bait-e-kaaba men chilla chadhaun main

ji chahta hai shauq-e-shahadat men qabl-e-marg

banva ke qabr-e-lala ko us par lagaun main

ghar men jo mujh faqir ke vo shah-e-husn aae

mizhgan ke boriye jo khade hain bichhaun main

kanta sukha ke hijr ne har-chand kar diya

vo gul-badan mile to na phula samaun main

tum to gharib-khane men aae na ek roz

farmaiye to shab ko kisi vaqt aauun main

barik-bin huun shaer-e-nazuk-khayal huun

mazmun jahan kamar ka mile bandh laun main

‘atish’ ghulam-e-saqi-e-kausar huun chahiye

firdaus ka khula hua darvaza paun main