udaas udaas tabi.at jo thi bahalne lagi
abhi main ro hi raha tha ki rut badalne lagi
paḌos valo! darichon ko mat khula chhoḌo
tumhare ghar se bahut raushni nikalne lagi
zara thame the ki phir ho ga.e ravan aansu
jo ruk ga.i thi vo gham ki barat chalne lagi
bhala ho shahr ke logon ki ḳhush-libasi ka
ki be-kasi bhi mira pairahan badalne lagi
Thahar ga.i hai kahan aa ke Dhalte Dhalte raat
miri nazar bhi charaghon ke saath jalne lagi
nazar uThi to andhera tha jab qadam uTThe
shua-e-mahr mire saath saath chalne lagi
sitam-zarifi-e-fitrat to dekhiye ‘az.har’
shabab aaya ghazal par to umr Dhalne lagi
Leave a Reply