tu harf-e-akhiri mira qissa tamam hai
tere baghair zindagi karna haram hai
karne hain tere jism pe ik baar dastakhat
taaki khuda se kah sakun tu mere naam hai
hota hai guftugu men bahut baar tazkira
yaani hava charagh ka takiya-kalam hai
pahle-pahal mili thi hamen shiddaton ki dhuup
ab yuun hai rabte ki sarae men shaam hai
akhir men bas nishan hain ‘sahar’ kuchh savaliya
phir is ke baad dastan ka ikhtitam hai
Leave a Reply