tu bhi chup hai main bhi chup huun ye kaisi tanha.i hai
tere saath tiri yaad aa.i kya tu sach-much aa.i hai
shayad vo din pahla din tha palken bojhal hone ka
mujh ko dekhte hi jab us ki angḌa.i sharma.i hai
us din pahli baar hua tha mujh ko rifaqat ka ehsas
jab us ke malbus ki ḳhushbu ghar pahunchane aa.i hai
husn se arz-e-shauq na karna husn ko zak pahunchana hai
ham ne arz-e-shauq na kar ke husn ko zak pahuncha.i hai
ham ko aur to kuchh nahin sujha albatta us ke dil men
soz-e-raqabat paida kar ke us ki niind uḌaa.i hai
ham donon mil kar bhi dilon ki tanha.i men bhaTkenge
pagal kuchh to soch ye tu ne kaisi shakl bana.i hai
ishq-e-pechan ki sandal par jaane kis din bel chaḌhe
kyari men paani Thahra hai divaron par kaa.i hai
husn ke jaane kitne chehre husn ke jaane kitne naam
ishq ka pesha husn-parasti ishq baḌa harja.i hai
aaj bahut din ba.ad main apne kamre tak aa nikla tha
juun hi darvaza khola hai us ki ḳhushbu aa.i hai
ek to itna habs hai phir main sansen roke baiTha huun
virani ne jhaḌu de ke ghar men dhuul uḌaa.i hai
Leave a Reply