tu apne husn ki ara.ishon men gum ho ja
mujhe na dekh mire saath sogvar na ho
tiri nazar ki ye avargi tujhe ma.alum
ḳhuda kare ki kabhi mujh pe ashkar na ho
ye marhala bhi miri vahshaton men baaqi hai
ki dil ke dard men tera koi shumar na ho
kabhi to ho ki kare tu bhi pyaar ke va.ade
kabhi to ho ki mujhe tera e.atibar na ho
ye soch kar tire daman se haath khinch liya
kahin ye dast-e-vafa tujh ko nagavar na ho
na jaane kyuun isi tashvish men guzari umr
ki zindagi kisi dast-e-karam pe baar na ho
Leave a Reply