hain agar dar-o-rasan sub.h-e-munavvar ke evaz
phir to ḳhurshed hi ubhrega mire sar ke evaz
ham ko bhi sar koi darkar hai ab sar ke evaz
patthar ik ham bhi chala dete hain patthar ke evaz
farq kya paḌta hai ho jaa.e agar dad-rasi
ik nazar dekh hi lo va.ada-e-mahshar ke evaz
ham ne chaha tha ki patthar hi se Thokar kha.en
sar bhi ik ham ko mila raah men patthar ke evaz
pasbanan-e-chaman rah ga.e bairun-e-chaman
nargis-e-ḳhufta mili sarv-o-sanobar ke evaz
ab kahan pahla sa saaqi ke karam ka dastur
aabru bechni paḌ jaati hai saghar ke evaz
kya ḳhabar hai vo chale aa.en saja luun ghar ko
mauj-e-gul aane lagi aaj to sarsar ke evaz
un ke va.ade ki jo tasdiq bhi chahi ‘nuri’
saaf inkar tha ta.id-e-mukarrar ke evaz
Leave a Reply