ḳhala ki ruuh kis liye ho mere iḳhtiyar men
uḌaan ka to zikr tak na tha mire farar men
kabhi to manzaron ke is tilism se ubhar sakun
khaḌa huun dil ki sat.h par ḳhud apne intizar men
ye sa.aton ki bhiiḌ ne use ganva diya na ho
rakha tha main ne ek lams vaqt ki darar men
safar men marhalon ki rasm bhi hai ab bujhi bujhi
vahi purani gard hai har ik na.e ghubar men
abad ki sarhadon ke paar bhi hadon ka shor tha
thi paikaron ki dastan ḳhala ke shahkar men
ye jism kyuun ye ruuh kyuun hayat kyuun ‘riyaz’ kyuun
sifar sifar ki guunj hai talash ke mazar men
Leave a Reply