kaaTi hai kaise sub.h kahan shaam bhuul jaa.en
Thahren kahin ye gardish-e-be-nam bhuul jaa.en
palkon pe aa saja len sabhi ḳhaar paanv ke
kyuun chalte chalte hone lagi shaam bhuul jaa.en
bahti havaon pe na.e nauhe likha karen
is ghumti zamin ka anjam bhuul jaa.en
khul jaa.en paniyon men jaziron ki khiḌkiyan
tujh se milen to ruuh ka kohram bhuul jaa.en
ye to na kar sake ki koi shaghl DhunD len
itna na ho saka ki tira naam bhuul jaa.en
Leave a Reply