ham apne ishq ki babat kuchh ehtimal men hain
ki teri ḳhubiyan ik aur ḳhush-ḳhisal men hain
tamiz-e-hijr-o-visal is maqam par bhi hai
hisab-e-rah-e-mohabbat men garche haal men hain
koi bhi paas nahin to tira ḳhayal na gham
ba-qaul-e-pir-e-jahan-dida ham visal men hain
bahut zaruri nahin hai ki tu sabab Thahre
ye baat apni jagah ham kisi malal men hain
guzishta saal raha jin pe tang arsa-e-vaqt
vo saare ḳhvab ba-ta.abir ab ke saal men hain
Leave a Reply