Tu Aaj Aaina-Ru Mujh Pas Aa Ja

tu aaj aina-ru mujh paas aa ja

bahar-surat mujhe surat dikha ja

tu aa ai atish-e-barq-e-gham-e-yar

mira ye khirman-e-hasti jala ja

miri aati hai bas niind aae to aap

ye apni chashm-poshi dekhta ja

miri jaari hain aansu aah qasid

shitabi kah ye us ko majra ja

likha main ne ye us yusuf ko kal khat

aziia dilbara nazuk-mizaja

rakhi hai chaah teri aah betab

qalaq is mere dil ka tu mita ja

khuda hi hai miri kashti ka hafiz

khuda ke vaste tu nakhuda ja

na sunva ghair ki baten sun ai yaar

tire jo ji men aave tu suna ja

vahi hai ja-ba-ja beja nahin ye

baja hai us ki hi har ek ja-ja

agar jaata hai ai mere masiha

ilaaj is dard-e-dil ka tu bata ja

miri siina pe rakh dast-e-nigarin

miri ye aag dil ki tu bujha ja

agar baitha hai naseh munh ko si baith

vagarna yaan se uth ai be-haya ja

tiri naubat hi ‘ehsan’ koi din yaan

tu Danka ishq ka har ja baja ja

Leave a Comment