tilism-e-nashsha-e-duniya bhi aaj ḳhatm hua
jo ho raha tha tamasha bhi aaj ḳhatm hua
mila jo us se to us ne bhi pher li nazren
chalo ye aḳhiri rishta bhi aaj ḳhatm hua
gira zamin pe sitara ye kis ke mizhgan se
ye kis ke dil ka sahara bhi aaj ḳhatm hua
mile jo barson ke pyase to aise ek hue
ki ehtiyat ka pahra bhi aaj ḳhatm hua
jo rafta-rafta hui ḳhatm vaz-e-derina
mohabbaton ka saliqa bhi aaj ḳhatm hua
tumhari yaad se samjhauta kar liya main ne
ḳhayal-e-va.ada-e-farda bhi aaj ḳhatm hua
na jaane kaise tujhe apna maan baiTha tha
miri nazar ka vo dhoka bhi aaj ḳhatm hua
tire taghaful-e-paiham ne kar diya mayus
mira vo zauq-e-tamanna bhi aaj ḳhatm hua
vo dil bhi le ga.e pahlu se uTh ke ai ‘tabish’
ye roz roz ka jhagḌa bhi aaj ḳhatm hua
Leave a Reply