Mahir Abdul Hayee
jo ba-zahir sahar-asar nazar aate hain
vo bhi andar se shab-e-tar nazar aate hain
kijiye kis se yahan qadr-e-hunar ki ummid
ab vo darbar na dur-bar nazar aate hain
kam se kam apne gareban hi ke purze karte
haath par haath dhare yaar nazar aate hain
shahr-dar-shahr makanon men andhera hai magar
jagmagate hue bazar nazar aate hain
kaun avaz uTha.ega hamare haq men
sab tire hashiya-bardar nazar aate hain
ye bhi mumkin hai ki uḌ jaa.en to lauTen na kabhi
jitne bachche hain vo par-dar nazar aate hain
kitni dilkash hai ye ummid ki rang-amezi
sang-dil log bhi dildar nazar aate hain
vo rahe honge nazakat men kabhi shaḳh-e-gulab
ab to jab dekhiye talvar nazar aate hain
kis ki aamad hai gharibon ke gali-kuche men
ujle ujle dar-o-divar nazar aate hain
jin ke didar ko firdaus-e-tamasha kahiye
zindagi men kahin ik baar nazar aate hain
shoḳhi-e-naqsh-e-qadam hai ki gulabon ki qatar
raste sab gul-o-gulzar nazar aate hain
jo har ik band se azad hain vo bhi ‘mahir’
apni ḳhaslat ke giraftar nazar aate hain
Leave a Reply