Jazib Quraishi
thakan ki gard se ḳhush-rang ahaTon men aa
adavaton ko bhula de mohabbaton men aa
na-jane kab se tira intizar hai mujh ko
ki niind toḌ ke be-ḳhvab raston men aa
mire ḳhayal ke saa.e tire badan ke aks
pukarte hain mulaqat ki hadon men aa
lipaT ga.i hai mire zehn se tiri ḳhushbu
main jal raha huun ki barish ke mausamon men aa
safar ki dhuup pighal ja.egi purani hai
gulab ban ke mahak meri dhaḌkanon men aa
bichhaḌna hai to bichhaḌ ja tabassumon ke saath
jo mujh se pyaar hai tujh ko to pattharon men aa
jo shaḳhs sho.ala-e-jan ban gaya numa.ish men
tujhe na luuT le vo meri dhaḌkanon men aa
Leave a Reply