Poet
thak thak ga.e hain ashiq darmanda-e-fughan ho
yarab kahin vo ghaflat fariyad-e-be-kasan ho
ya qahr hai vo shoḳhi ya parda hai nazar ka
dil men to us ka ghar ho aur aankh se nihan ho
ye shor bhar raha hai fariyad ka jahan men
jo baat lab pe aa.i ulTi phiri fughan ho
kis kis dua ko mangen kya kya havas nikalen
ik jaan kidhar kidhar ho ik dil kahan kahan ho
bargasht-agi-e-qismat ye chheḌ kya nikali
jo mudda.a-e-dil ho vo mudda.i-e-jan ho
maqdur tak to apne tujh se nibha.enge ham
be-jan-o-dil hain hazir gar qasd-e-imtihan ho
sayyad main nahin huun gum-karda ashiyan huun
ai ham-safiro bolo kis ja ho aur kahan ho
ai aah dil se uTh kar lab par hai kya ta.amul
ja shorish-e-zamin ho ashob-e-asman ho
miT miT ke bhi hamara ik ban rahega saman
ujḌe agar baharan abadi-e-ḳhizan ho
jab baiThne pe aa.e ai zo.af baiTh rahiye
phir kya hai ye takalluf us ka hi astan ho
tu hi rahegi bulbul ya main hi is chaman men
ya tera hi ho qissa ya meri dastan ho
mere suḳhan men kya hai kuchh ḳhal-o-ḳhat bayan hai
par dil se us ke puchhe jo koi nukta-dan ho
mera salam kahna jhuk kar ‘qalaq’ vahi hai
us ki gali men baiTha mauzun sa jo javan ho
Leave a Reply