Poet
main huun apne kamre men jaise ajnabi tanha
aap bhi chale aate is taraf kabhi tanha
har taraf havadis ki maujzan hava.en hain
kis se kis se Takra.e ek aadmi tanha
ja ke bas koi itna ahraman se kah deta
vaqt ka mudava hai aaj raushni tanha
dekhne men duniya hai ik hujum-e-dil-daran
sochiye to hoti hai har ki zindagi tanha
har taraf sisakne ki aa rahi thiin avazen
ro rahi thi sahra men raat chandni tanha
shahar shahar maskan hai zulmaton ka ab yaaro
gaanv gaanv raqsan hai aaj tirgi tanha
aap ne na pahchana haan vahi to pasha tha
vo ḳhamosh gum-sum sa ek aadmi tanha
Leave a Reply