Farhat Qadri
tha pa-shikasta aankh magar dekhti to thi
maana vo be-amal tha magar agahi to thi
ilzam-e-narasi se mubarra nahin thi siip
lekin kisi ke shauq men Duubi hui to thi
maana vo dasht-e-shauq men pyasa hi mar gaya
ik jhiil justuju ki pas-e-tishnagi to thi
ehsas par muhit the lafzon ke da.ere
lafzon ke da.eron men magar zindagi to thi
viran tha sehn-e-bagh magar is qadar na tha
kone men sukhe patton ki mahfil jami to thi
gham duur kar ke aur bhi mafluj kar diya
tanha.iyon ki raat men dil-bastagi to thi
is ThanDi raat men to andhere ka raaj hai
suraj jala raha tha magar raushni to thi
Leave a Reply