Poet
tez hava aur shab-bhar barish
indr chup aur bahar barish
aise pahle kab barsi thiin
ankhen aur barabar barish
sahra to pyase ka pyasa
aur bhare dariya par barish
is sur-tal ka aur maza tha
kachche ghar ki chhat par barish
jhuum rahe hain bhiig rahe hain
ped parinde manzar barish
main ne badal ko bheji thi
ik kaghaz par likh kar barish
mere ashkon se likkhe ko
vo padhta hai aksar barish
kaun ye dekhe dida-e-pur-nam
ik barish ke andar barish
yaad bahut aate hain ‘janan’
haath men haath aur sar par barish
Leave a Reply