Falak Banaya Gaya Hai Zamin Banai Gai

Nabeel Ahmad Nabeel

falak banaya gaya hai zamin bana.i ga.i

amaan ki koi jagah hi nahin bana.i ga.i

nikalti kis tarah koi yaqin ki surat

yaqin ki koi surat nahin bana.i ga.i

chalenge ham bhi mohabbat-nagar samajh ke use

gar aisi koi bhi basti kahin bana.i ga.i

bujhe bujhe hue manzar vo jis maqam ke the

hamare rahne ki surat vahin bana.i ga.i

jab us ko ghaur se dekha to aankh bhar aa.i

samajh raha tha main duniya hasin bana.i ga.i

kasak saja.i ga.i us men pahle sajdon ki

phir us ke ba.ad hamari jabin bana.i ga.i

‘nabil’ utara gaya mujh ko asman se yuun

fasurda ḳhaak miri ham-nashin bana.i ga.i