karta hai qatl-e-am vo aghyar ke liye
das biis roz marte hain do-char ke liye
dekha azab-e-ranj dil-e-zar ke liye
ashiq hue hain vo mire azar ke liye
dil ishq tere nazr kiya jaan kyunki duun
rakkha hai us ko hasrat-e-didar ke liye
qatl us ne jurm-e-sabr-e-jafa par kiya mujhe
ye hi saza thi aise gunahgar ke liye
le tu hi bhej de koi paigham-e-talkh ab
ye tajviz zahr hai tire bimar ke liye
aata nahin hai tu to nishani hi bhej de
taskin-e-iztirab-e-dil-e-zar ke liye
kya dil diya tha is liye main ne tumhen ki tum
ho jaao yuun udu mire aghyar ke liye
chalna to dekhna ki qayamat ne bhi qadam
tarz-e-khiram o shokhi-e-raftar ke liye
ji men hai motiyon ki ladi us ko bhej duun
izhar-e-hal-e-chashm-e-guhar-bar ke liye
deta huun apne lab ko bhi gul-barg se misal
bose jo khvab men tire rukhsar ke liye
jiina ummid-e-vasl pe hijran men sahl tha
marta huun zindagani-e-dushvar ke liye
‘momin’ ko to na laae kahin daam men vo but
dhunde hai tar-e-subha ke zunnar ke liye
Leave a Reply