kyuun jal-bujhe kahin to giraftar bolte
zindan men chup rahe to sar-e-dar bolte
ghar ghar yahan tha gosh-bar-avaz der se
aati sada to sab dar-o-divar bolte
hota tumhare ḳhuun ka dariya jo maujzan
tufan samundaron men ba-yak-bar bolte
deta tumhara nutq daha.i to fitratan
lauh-o-qalam ke baam se fankar bolte
tum bolte agar to tumhari nida ke saath
basti ke saare kucha-o-bazar bolte
ab ḳhalvaton men shor machane se fa.eda
tha hausla to bar-sar-e-darbar bolte
dast-e-ḳhizan tha ḳhana-bar-andaz jis ghaḌi
kyuun gung the chaman ke parastar bolte
suraj ne kitne jism jala.e hain raah men
itna to zer-e-saya-e-divar bolte
laata vafa ki jins jo bazar men koi
boli ba-qadr-e-zarf-e-ḳharidar bolte
‘zulfi’ kali kali men machalta naya lahu
aata vo sail-e-rang ki gulzar bolte
Leave a Reply