Shahzad Ahmad
tiri talash to kya teri aas bhi na rahe
ajab nahin ki kisi din ye pyaas bhi na rahe
har ek samt ḳhala hi ḳhala nazar aa.en
ḳharaba-e-dil-e-viran men yaas bhi na rahe
gham-e-firaq ki talḳhi vo dasht hai ki jahan
koi qarib to kya as-pas bhi na rahe
tira ḳhayal hi par tol kar uḌa le jaa.e
koi umiid sharik-e-havas bhi na rahe
tamam rang hai ḳhushbu tamam ḳhushbu rang
gulon se rang uḌa len to baas bhi na rahe
luTa hai qafila-e-agahi do-rahe par
zamana-saz to kya ḳhud-shanas bhi na rahe
kisi tariq se ‘shahzad’ dil ko samjha len
na muskura.e magar yuun udaas bhi na rahe
Leave a Reply