Baqi Siddiqui
tiri nigah ka andaz kya nazar aaya
daraḳht se hamen saaya juda nazar aaya
bahut qarib se avaz ek aa.i thi
magar chale to baḌa fasla nazar aaya
ye raste ki lakiren bhi gum na ho jaa.en
vo jhaḌiyon ka naya silsila nazar aaya
ye raushni ki kiran hai ki aag ka sho.ala
har ek ghar mujhe jalta hua nazar aaya
kali kali ki sada gunjne lagi dil men
jahan bhi koi chaman-ashna nazar aaya
suno to kis liye patthar uTha.e phirte ho
kaho to a.ina-ḳhane men kya nazar aaya
ye dopahar ye pighalti hui saḌak ‘baqi’
har ek shaḳhs phisalta hua nazar aaya
Leave a Reply