Na dekha Rukh Be-Naqab-E-Mohabbat

na dekha rukh be-naqab-e-mohabbat

mohabbat hai shayad hijab-e-mohabbat

barasta hai kaif-e-shabab-e-mohabbat

har aansu hai jam-e-sharab-e-mohabbat

ajab josh par hai shabab-e-mohabbat

mohabbat hai mast-e-sharab-e-mohabbat

zahe khvab o tabir khvab-e-mohabbat

mohabbat hi nikli javab-e-mohabbat

mujhe kya padi hai tire dar se utthun

thaharne jo de iztirab-e-mohabbat

dil-e-zarra zarra hai tur-e-tajalli

zahe jalva-e-aftab-e-mohabbat

sabhi uth gae diida o dil se parde

na uttha magar ik hijab-e-mohabbat

na rakkho gharaz ham se itna hi kah do

halak-e-tabassum kharab-e-mohabbat

lahu ki har ik buund dil ban gai hai

khusha lazzat-e-kamyab-e-mohabbat

hudud-e-mohabbat se bhi badh gae ham

salamat rahe iztirab-e-mohabbat