Jaikrishn Chaudhry Habeeb
tiri mohabbat men gham jo aa.e to us se baḌh kar ḳhushi nahin hai
vafa ki manzil ke ḳhaar men bhi gulon se kam dil-kashi nahin hai
na tujh men jur.at hai rind ki si na tujh men vus.at dil-o-nazar ki
aziim shai hai ye rasm-e-rindi ye sirf bada-kashi nahin hai
libas-e-nau men havas ne aa kar mazaq-e-husn-o-nazar hain badle
vo ishq men hai na sarfaroshi vo husn men dilbari nahin hai
tujhi se garmi thi mahfilon ki tujhi se thi vo chaman ki sairen
nahin vo mahfil men lutf baaqi gulon ke lab par hansi nahin hai
nahin ye mumkin ki us ke dar se tu ḳhali daman hi lauT jaa.e
talab hi teri hai ḳhaam ab tak nazar bhi dar par jami nahin hai
ḳhirad ki go hain hazar ankhen hai dil ki sirf ek aankh lekin
jo dil ki bujh jaa.e sham-e-ulfat to phir kahin raushni nahin hai
gham-ashna tera dil nahin hai to aa.e us men gudaz kaise
jo saaz dil ka nahin hai TuuTa to us men phir naghmagi nahin hai
karoge kya tum ‘habib’ aḳhir hayat-e-tul-o-tavil le kar
tabassum-e-gul ke ek lamhe men kya koi zindagi nahin hai
Leave a Reply