tiri justuju men nikle to ajab sarab dekhe
kabhi shab ko din kaha hai kabhi din men ḳhvab dekhe
mire dil men is tarah hai tiri aarzu ḳhiraman
koi naznin ho jaise jo khuli kitab dekhe
jise meri aarzu ho jo ḳharab-e-ku-ba-ku ho
mujhe dekhne se pahle tujhe be-naqab dekhe
jise kuchh nazar na aaya ho jahan rang-o-bu men
vo khila gulab dekhe vo tira shabab dekhe
do-jahan ko la Dubo.e vo zara si aabju men
tiri chashm-e-surmagin ko jo koi pur-ab dekhe
yuun Thahar Thahar ke guzri shab-e-intizar yaaro
ki sahar ke hote hote ka.i ham ne ḳhvab dekhe
mujhe dekhna ho jas ko mire haal par na jaa.e
mira zauq-o-shauq dekhe mira intiḳhab dekhe
Leave a Reply