tiri duniya men jangal hain
hare baghat hain
aur duur tak phaile bayaban hain
kahin par bastiyan hain
raushni ke mantaqe hain
pahadon par utarte badalon men
raqs karta hai samundar char-su
isi amboh ka hissa nahin huun main
kahan huun main
main tere lams se ik aag ban kar phailna
taskhir ki surat bipharna chahta tha
aur itra huun
kisi be-mehr sannate ke maidan men
hazimat ki dahakti ret par
bikhra pada huun shaam ki surat
main jiina chahta tha teri duniya men
tire honton pe khilte naam ki surat
kahin dushnam ki surat
kahin aram ki surat
main aansu tha
tire chehre pe aa kar phuul dharta tha
tire dukh par
gira karta tha qadmon men
ai chashm-e-tar kahan huun main
andhere se bhari ankhon men
chalti hai hava har-su
aur udte ja rahe hain raste us men
zamanon ke kinaron se
abad ke sard khanon tak
hava chalti hai har-su
aur us ki ham-rahi men
do-qadam chalta nahin huun main
hujum-e-roz-o-shab men
kis jagah sahma hua huun main
kahan huun main
tiri duniya ke naqshe men
kahan huun main
Leave a Reply