Zia Faruqi
shahr-ashob likhun shahr-e-tamanna likkhun
ai dayar-e-gham-e-janan men tujhe kya likhun
nisbaten saari adhuri hain to rishta kaisa
ban ke vo mauj uThe ḳhud ko main dariya likkhun
be-hisi itni ki main ḳhud se bhi begana rahun
dard itna hai ki beganon ko apna likkhun
husn ke ruup hain itne ki qalam hairan hai
ishq men Duub hi ja.un use yakta likkhun
apne ghar ki na.i tariḳh ke auraq pe ab
kahin dimak kahin makḌi kahin jaala likkhun
ik nazar samne divar pe chaspan kar ke
apna anjam paḌhun us ka sarapa likhun
umr-bhar ek hi tasvir bana.i main ne
apni avara-mizaji pe ‘ziya’ kya likkhun
Leave a Reply