tiri ankhon ka manzar samne hai
main pyasa huun samundar samne hai
ana badhne nahin deti hai aage
mire raste ka patthar samne hai
khayalon se hai koson duur lekin
nigahon men vo aksar samne hai
main khud se roz hota huun baghal-gir
mira apna hi paikar samne hai
na jalva hai na aina hai koi
ye hairat hai vo kyunkar samne hai
masafat hai ik aina-nazar ka
kahin jaun mira ghar samne hai
khila hai ai ‘ziya’ nazron men ik phuul
koi surat badal kar samne hai
Leave a Reply