tere ye jan-nisar-o-talab-gar dekh kar
hairan huun ek anaar sau bimar dekh kar
gul phuul aab aab hue kal chaman ke biich
gul ke hamare atishin ruḳhsar dekh kar
sidra sarv sanobar-o-tuba khaḌe khaḌe
sar-gashta hain chaman men qad-e-yar dekh kar
pairon men dil-zadon ke na chubh jaa.en ustuḳhvan
is raah se guzar ho to sarkar dekh kar
hasrat gale se aur lagane ki baḌh ga.i
nazuk se haath men tire talvar dekh kar
ya jism-o-jan men aah vo taqat nahin rahi
ya Dar gaya huun vaqt ki raftar dekh kar
ifrit-ḳhana sa hua juz ghar tire pari
rahta hai Dar sa ab dar-o-divar dekh kar
‘havi’ hamari jaan men kuchh jaan aa ga.i
maqtal men apne ḳhaas vafadar dekh kar
Leave a Reply