Syed Mohammad Askari Arif
tire nazdik aata ja raha huun
vajud apna miTata ja raha huun
muqaddar azmata ja raha huun
main tujh se dil lagata ja raha huun
zabani tiir khata ja raha huun
main phir bhi muskurata ja raha huun
tujhe paane ki ik ḳhvahish men janan
main kitne zaḳhm khata ja raha huun
andheron se bahut Darta huun lekin
charaghon ko bujhata ja raha huun
rakhe the raah men jo doston ne
main sab patthar haTata ja raha huun
laga kar aag apne hi makan men
main sho.alon ko bujhata ja raha huun
azal ki samt se chal kar main ‘arif’
abad ki samt jaata ja raha huun
Leave a Reply