har tarah ke jazbat ka elaan hain ankhen
shabnam kabhi shoala kabhi tufan hain ankhen
ankhon se badi koi tarazu nahin hoti
tulta hai bashar jis men vo mizan hain ankhen
ankhen hi milati hain zamane men dilon ko
anjan hain ham tum agar anjan hain ankhen
lab kuchh bhi kahen is se haqiqat nahin khulti
insan ke sach jhuut ki pahchan hain ankhen
ankhen na jhukin teri kisi ghair ke aage
duniya men badi chiiz miri jaan! hain ankhen
Leave a Reply