Ishaq Athar Siddiqui
tire karam ka mire dasht pe jo saaya hua
mujhe laga hi nahin main bhi huun sataya hua
vo tajrabat ki had se nikal gaya aage
vo ek shaḳhs ki tha mera azmaya hua
kisi ke dast-e-hina.i ka lams raushan tha
koi charagh na tha haath men chhupaya hua
hamara naam nahin hai hamara zikr nahin
magar yahan se koi lafz hai miTaya hua
main kaise us se alag ho ke dekh sakta huun
kisi ka rang rag-o-pai men hai samaya hua
vo afiyat hai jahan ji rahe hain barson se
isi gali men hai pauda mira lagaya hua
hava chali to safar sahl ho gaya ‘at.har’
safina tha kisi tufan se Dagmagaya hua
Leave a Reply