Qaisar Siddiqi
ḳhvab jo dekhe hain main ne unhen paikar dega
mera sahra mujhe ik roz samundar dega
ek qatra jo larazta hai miri palkon par
zard mausam ko yahi qatra hara kar dega
mujh ko kuchh aur fazaon men bikhar jaane do
mera ehsas ḳhalaon men mujhe ghar dega
huun gunahgar magar itna gunahgar nahin
mujh ko dega bhi to vo phuul sa patthar dega
sochta huun to thakan aur bhi baḌh jaati hai
phir mujhe izn-e-safar harf-e-mukarrar dega
isi aalam men mire ḳhvabon ki duniya bhi hai
meri duniya ko bhi vaqt ek payambar dega
mere hamraz mire dost mire saath na chal
lamha lamha tujhe avaz ki Thokar dega
Leave a Reply