Etibar Sajid
tire jaisa mera bhi haal tha na sukun tha na qarar tha
yahi umr thi mire ham-nashin ki kisi se mujh ko bhi pyaar tha
main samajh raha huun tiri kasak tira mera dard hai mushtarak
isi gham ka tu bhi asiir hai isi dukh ka main bhi shikar tha
faqat ek dhun thi ki rat-din isi khvab-zar men gum rahen
vo surur aisa surur tha vo khumar aisa khumar tha
kabhi lamha-bhar ki bhi guftugu miri us ke saath na ho saki
mujhe fursaten nahin mil sakin vo hava ke rath par savar tha
ham ajiib tarz ke log the ki hamare aur hi rog the
main khizan men us ka tha muntazir use intizar-e-bahar tha
use padh ke tum na samajh sake ki miri kitab ke ruup men
koi qarz tha kai saal ka kai rat-jagon ka udhar tha
Leave a Reply