Shab Tum Jo Bazm-E-Ghair Mein Aankhen Chura Gae

shab tum jo bazm-e-ghair men ankhen chura gae

khoe gae ham aise ki aghyar pa gae

puchha kisi pe marte ho aur dam nikal gaya

ham jaan se inan-ba-inan sada gae

phaili vo bu jo ham men nihan misl-e-ghuncha thi

jhonke nasim ke ye naya gul khila gae

ai ab-e-ashk atish-e-unsur hi dekhna

ji hi gaya agar nafas-e-shola-za gae

majlis men us ne paan diya apne haath se

aghyar sabz-bakht the ham zahr kha gae

uttha na zof se gul-e-dagh-e-junun ka bojh

qarun ki tarah ham bhi zamin men sama gae

ghairon se ho vo parda-nashin kyuun na be-hijab

dam-ha-e-be-asar mire parda utha gae

thi bad-gumani ab unhen kya ishq-e-hur ki

jo aa ke marte dam mujhe surat dikha gae

tabinda o javan to bakht-e-raqib the

ham tira-roz kyuun gham-e-hijran ko bha gae

be-zar zindagani ka jiina muhal tha

vo bhi hamari laash ko thokar laga gae

vaaiz ke zikr-e-mehr-e-qayamat ko kya kahun

aalam shab-e-visal ke ankhon men chha gae

jis vaqt us dayar se aghyar-e-bul-havas

bad-khuiyon se yaar ke ho kar khafa gae

duniya hi se gaya main junhi naaz se kaha

ab bhi guman-e-bad na gae tere ya gae

ai ‘momin’ aap kab se hue banda-e-butan

baare hamare diin men hazrat bhi aa gae

Leave a Comment