Sufi

Tere Husn-e-Nazar Ka Ye Bhi Ek Eajaz Hai Saqi

tire husn-e-nazar ka ye bhi ik eajaz hai saaqi

ki har mai-kash zamin par asman parvaz hai saaqi

khayal itna rahe bas apne saghar ki pilane men

tira anjam hai saaqi mira aghaz hai saaqi

kahin baham-digar takra na jaaen saghar-o-mina

mai-e-sa-josh is dam mail-e-parvaz hai saaqi

jabin-e-shauq sajda kar kahan ka pas-e-rusvai

khusha-vaqte ki sargarm-e-khiram-e-naz hai saaqi

idhar bhi ik nazar o sab ki janib dekhne vaale

ki ik rind-e-kharabati nazar-andaz hai saaqi

karen tauba to dil bechain agar pi len to rusvai

ajab uljhan men apni mai-kashi ka raaz hai saaqi

sharab-e-arghavani bhi piyun main khud to paani hai

pilae tu jo paani bada-e-shiraz hai saaqi

pas-e-tauba mujhe piine men akhir kyon taammul ho

ba-hamdillah dar-e-tauba abhi tak baaz hai saaqi

vo kyon jaane laga dair-o-haram ki thokaren khane

tire ‘afqar’ ko tere mai-kade par naaz hai saaqi

More Poems

Leave a Comment