tere gham ko apni raton ka muqaddar kar liya
jagna tha is liye kanTon pe bistar kar liya
jis ko chaha bas usi ka rasta takte rahe
pattharon ki justuju men ḳhud ko patthar kar liya
haa.e vo ehsas harf-e-arzu kahne ke ba.ad
yuun laga tha jaise koi ma.arka sar kar liya
ham to maazi ko asas-e-zindagi kahte rahe
aur us ne apne mustaqbil ko behtar kar liya
bas yahi mumkin tha ham se dasht-e-ghurbat men ‘aqil’
apne qad ko apni chadar ke barabar kar liya
Leave a Reply