Poet
tire baghair lag raha hai ye safar ḳhamosh hai
hava thami hui hai aur rahguzar ḳhamosh hai
hain apni apni ja pe donon muztarib ki kya karen
tiri nigah men shor hai miri nazar ḳhamosh hai
tiri sada.en aa nahin rahi hain is sukut men
ki honT hil rahe hain tere tu magar ḳhamosh hai
pukarta huun apne-ap ko ki mar na ja.un main
magar pukar par miri tarah nagar ḳhamosh hai
koi to gung rah gaya kisi ko saanp Das gaya
ki baam chup hai dar khula paḌa hai ghar ḳhamosh hai
Leave a Reply