Rais Amrohvi
tira ḳhayal ki ḳhvabon men jin se hai ḳhushbu
vo ḳhvab jin men mira paikar-e-ḳhayal hai tu
sata rahi hain mujhe bachpane ki kuchh yaden
vo garmiyon ke shab-o-roz dopahar ki vo lu
pachas saal ki yadon ke naqsh aur naqshe
vo koi nisf sadi qabl ka zamana-e-hu
vo garm-o-ḳhushk mahine vo jeTh vo baisakh
ki hafize men kabhi aah hain kabhi aansu
vo zaa.en zaa.en ke kitne muhib zanaTe?
faza ka haul hava ki vo vahshaten har su
vo saa.en saa.en ke kitne ajiib sannaTe?
vo sansani vo pur-asrar ek alam-e-hu
vo dopahar vo habuḌe vo sengi baa.i kuuT
faza-e-sho.ala-bajan o hava-e-atish-e-ḳhu
vo khiḌkiyon men havaon ki sar-kashi tundi
vo bam-o-dar pe musallat jahannami jaadu
vo pech-o-tab bagulon ka mere angan main
chuḌelen ghar men ghus aa.i hain khaul kar gesu
vo lu ka zor ki saare kivaḌ bajte hain
ki jaise lashkar-e-jinnat ka amal har su
vo shor jaise bagulon men bhuut hon raqsan
vo qah-qah vo ha-ha vo honk vo hu-hu
guzar raha hai tasavvur se jeTh ka mausam
aur is samay men mujhe yaad aa raha hai tu
Leave a Reply